அகிலா

இரவின் மிச்சங்களை மறந்துவிட்டு காலை குளிரில் குளித்து ஒரு ரோஜாவை கிள்ளி சூடி சேலைக்கு சரியாய் பொட்டிட்டு பேருந்தில் உட்காரும் போது ஞாபகம் வந்தது காதில் இருப்பதை குளியலில் கழட்டியது கைப்பையில் துழாவினால் மாட்டியது நீல கல் வைத்த டிராப்ஸ் மஞ்சள் கலர் சேலைக்கு நீல கல் தோடா... இவ்வளவு காலையில் பேன்சி ஸ்டோர் திறந்திருக்காதே... யோசனையாய் கையில் உருண்டு கொண்டிருந்தது கம்மல்... சட்டேன்று சேலையை கவனித்தால் மஞ்சளில் அங்கங்கே நீலமும் சிவப்புமாய் சிறு பூக்கள் சின்னதாய் ஒரு சந்தோஷம் சிறகடித்தது இப்போது நீலமும் மஞ்சளும் சமாதானமாய் என் காலையும் இனிதாய்....